Thatlai leh vanglai nun hi a hlu em em a, mihringte kan damchhung a kan hma hun siamna hun a nih avangin kan hman thiam hi a pawimawh em em a ni. Vanglai leh thalai nun kan hman chhung pawh a inchen lo thei hle ang a, abikin hmeichhia te pasal kan neih chuan kan thalai nun kan vuiliam chu a ni ber mai. Kum 1981 kuma UNO General Assembly khan kum 15-24 inkar te hi thalai tiin a pawm a. India National Youth Policy 2014 ah chuan Kum 15-29 te hi thalai tiin a chhiar ve thung a, kan ram Presbyterian Kohhrante hian Kum 15-40 inkar hi KTP member ah pawm ve thung. Keini Kohhranah hian kum bithliah tak hi kan nei lem lo niin alang.
Thalai kan han tih mai hian a kum bithliah fel fak lo mah ila, vanglai hun leh kan chak lai hun sawina a ni tih kan hre theuh awm e. Thalai nih lai hi taksa leh rilru lama kan harhvan ber hun lai ani a, kum upa te aiin ngaihtuahna lamah fim viau lo zawk mah ila, tha thawh kawngah te, ruahmanna bawhzui kawngah te, hnatlang leh pawimawh ah a chak ber ber te kan nih avangin Kohhran tan thalaite hi kan pawimawh em em a ni.
Kohhran leh Khawtlang tan a hnathawk tur hian mi tha ber ber chu thalaite an ni a, a tha zawng leh achhe zawng pawhin thalaite hi a thawhhlawk ber chu thalai kan ni. Thalai ten hna an thawh tamna hmun apiangah hmasawnna a chak a, ram pawh achangkang zel a ni.
Khawvel hmasawnna leh ropuina hi Thalaite kutah a in nghat lian hle a, Nakin a khawvel hmasawnna tur pawh hi tuna thalaite kutah hian a awm kan ti thei awm e. Chutiang bawk in, Keini Pentecost Kohhrante ah pawh hian vawiin a kan thalaite hi an pawimawh hle a, kan zirna leh kan thiamna hi nakin akan Kohhran hmel tur chu a ni.
Chutihrual chuan kan Khawvel hi tunlai thalaite tan hian finna ah ropui in sang tawh hle mah se, Sualna leh thil thalo tihna atan chance asang em em tawh bawk chu a nih hi maw!! Vawiin a kan Kohhran dinhmun hi, kan thalaite leh kan fate tan kan Kohhran thanlenpui tlak a kan siam ve pawh atul hle a ni tih hi kan hriat a pawimawh hle a ni.

Kohhran a Thalaite mawhphurhna :
Thalaite hi Kohhran kut leh Ke a ni a, Kohhran ah thalaite an chak chuan Kohhran hi a chak mai thin. Kohhran Ban leh Kohhran kut te kan zawi viau chuan Kohhran chu kan chak dawn lo anih mai chu. Kan naupan laiin Biak In ah rawngbawltuten Pathian hnenah min hlan a, Krista ah kan seilen theih nan leh kan nun te min vensak nan Sunday School te min siamsak bawk a. Kan puitlin hun tur leh Kohhran a kan tangkai ve hun tur hi tlumte thlir in min thlir reng tih kan hriat a pawimawh hle a ni.
Khawvel zirna ah te pawh thiamna sang tak nei ila, kan thiamna te chu Kohhran tan hian kan hman hun tur hi an nghakhlel em em a ni. Kan zirna chu asang emaw, ahniam emaw pawh ni se, mahni tawk a ke a kan din ve theih takah hian Kohhran chu kan ensan mai dawn em ni? Nu leh Pa ten an fate theih tawkin an enkawl a, an ei ai te an pe ang hian, Kohhran pawh hian kan Thlarau nun nasa takin min vensak a, min zirtir a, thu leh hla in min chawm lian a. Kan lo puitlin taka hian kan nu leh pa Kohhran chu kan enkawl ve tur a ni dawn lawm ni.

Thalaite hlimna tur chu Kohhranah :
Thalai nun hi a chak em em a, hlimna te a zawng a, a hmuh hmasak apiang chu a hlimna tur emaw a tiin apawm hma em em thin. Chu kawng chu zawh fuh lo te tan chuan damchhung a mahni nun tihchhiatna a ni a, Kawng zuhfuh talo pawh an tam hle anih hi.
Thalaite hlimna tak tak chu Kohhranah hian a awm ani tih hi Luka ziak tlukin pawm ang che. Kohhran pawn a kan hlimna tam takah hian thil pawi a in phum ru hnem em em a, kan siamthat leh theih tawh loh khawp History tam tak kan ziah theihna atam em em a ni. Chung lak ata min veng tur chuan Kohhran hi kan mamawh hle a ni. Kan awmna Kohhran chu alian emaw, a te emaw pawh nise ka tan chuan Kohhran tha ber a ni tih hi kan pawm a, Kan Thlarau nun vengtu atan atha tawk ani tih hi kan pawm tur a ni.
Nitin a kan hlimpui thin; Social media hrang hrang leh kan hnathawhna hmun thleng hian, mahni nun tihchhiat vek duh na tur khawp a hlauhawm hi a inphum hnem em em mai a. Engtik lai pawh a kan taksa a bet ta tlat mai Mobile Phone te hi kan va hlim pui em!! Mahse maw ka unau duhtak, i mobile Phone kenlai kha Kohhran in a venpuina leh Kohhran Krista taksa zahna ineih loh hun hunah chuan chatuan meipui a hnukliamtu tur che a ni thei ania. Kohhran a theih tawp a in hmangte nun an hian inchhirna hmel hmuh tur a awm ngai lova, Kohhran Programme piah lama hlimna zawngte hian atawpah chuan an hlimna neih let nan Kohhran bawk hi an mamawh leh thin a nih hi.

Zahawmna chu Kohhranah :
Zahawmna kan thlirna hi a in anglo viau mai thei a, Sum leh Pai ngah hi zahawmna teh nan a hmang pawh kan awm mai thei. Amaherawhchu, Kohhran hriatpui tlak loh a sum lalutte hian tu zah mah an kai chuang miah lo nia. Khawvel zirna ah sang tak tak zir ila, Sum leh Pai tam tak dekchhuak pawh ni ila Kohhran ah inhmanna chang ka hre lo anih chuan tunge min zah chuang ang le??
Thufing 22:1 ah chuan, “Sum tam tak aiin hmingthat hi thlan zâwktûr a ni” tih kan hmu a. Tawngkam fiamthu pakhat chuan, ‘Sum tam tak leh Hmingthat hi thlan tur a ni’ an ti a, adik viau a ni. Veng pakhat a Zu ngawl vei te pawh hi min nuihzat leh an biak chawhchhi te pawh nise, Piantharna an chan a, Biak In ah te an hmel kan hmuh fo va, lamtual ah te an lam ve chuan thawhklehkhat ah kan endan leh kan hmuhdan chu adang daih thin anih hi. Kohhran hian zahawmna min pek a sang em em a, a hmang sual leh hmaikawr a hman pawh a awm theih awm e.
Tlangval pakhat chuan apa hnenah, ‘Kapa, kan nunna hlutna ber enge’ tiin a zawt a. Apa chuan, “He Lunghlu tlang hi keng la, chawhmeh zawrhna ah te, Puanthuina hmun leh Rangkachak chherna ah te va zuar ang che. Engzat man nge an tih chuan i kut tang pahnih i en tir dawn nia” tiin a chah a. Chawhneh zuartu chuan cheng sawmhnih in angam a, Puan thuitu chuan cheng zahnih in lei alo tum ve thung a. Rangkachak chhertu chuan, akut tang pahnih a en chuan, ‘ Hetiang lunghlu tha bik te chu avang asin’ tiin cheng nuaih hnih in a duh thu asawi ta thung a. Apa hnenah chuan an lei ngamna theuh ava sawi ta a.
Kan awmna tur hmun a kan awm te, kan tih tur dik tak kan tih hi kan hlutna leh zahawmna ber chu a ni. Mihring nun hi Pathian tello hian zahawmna leh mawina kan nei lova, Kohhran a thahnem ngai te, Kohhran ho zinga tel tam te hi thalai te hian kan mawina leh kan zahawmna a ni tih i hrereng ang u.

Krista tana Sengkhawm :
Kohhran thalai ten kan thupui ber chu, “Krista tana Sengkhawm” a ni a, Thalai te bakah Kohhran in kan hmalakna lian ber chu chanchintha hril hi a ni. Hemi kawngah hi chuan keini thalai te aia tha thawh thei leh chak hi an awm lo. Thalai ten chanchintha an puanna hmun leh Ramthim an veina Kohhran chu a nung ngei ngei thin. Kum Upa ten chanchintha hi puanchhuah leh fehchhuahpui pawh chak hle mah se, an taksa leh theihna in atlin tawh lova. Chanchintha puandarh hna hi chu Thalaite kutah Lalpan adah a ni tih hi kan hriat reng a pawimawh hle a ni.
Tun hma chuan miten Pathian thu an au pui a, Biak In leh khawlai ah te, mi In ah te lengin tawngka in an sawichhuah angai thin. Chutiang bak chu chanchintha han puan dan dang a awm lem lo. Amaerawhchu, khawvel a changkang zel a, Technology hrang hrang arawn chhuak a, mi kan buai a, Biak In ah Pathian thu ngaithla hman lo kan tam ta hle mai. An hnathawh karah te, an khualzin kawngah te Mobile phone hmang te in Youtube leh thildang hmang te pawhin an ngaithla nasa ta hle a ni. Heng thiamna hrang hmanga chanchintha puangchhuak tur hian tunlai thiamna te hi kum upa zawk ten an man pha ta meuh lo, Thalai te kan chet loh chuan kum Upa zawk ten an hriatthiam loh tur atam tawh hle a ni hi.

Pathian thu a in tlansiakna a chak tawh in, thiamna leh zirna hrang hrangte alo chhuak a. Tawng hrang hrangte nen chawhpawlhin thiamna leh hriatna te tihpun alo ngai ta a, hengte hi keini thalai te hmachhawn tur a ni. Kan kum Upa zawk ten anmahni hunah Pathian thu a in dona chu a hunblai ang zelin an hmachhawn a, tunah chuan Online leh Internet hmang te a Pathian thu a indona a tam ta hle mai. Hengte hi kum Upa ten an thiam loh thil tam tak a awm tawh a, chuvangin, tun hunah hian Sengkhawmna hna hi Thalaite Mawhphurhna a ni tih i hrereng ang u.