Aizawl East District Day:
May 8, Zirtawpni kha Aizawl East District dinchampha vawi 32-na niin Kohhran chuan ni pawimawh-ah puangin he ni hian Aizawl East District Office chawlh-ah puan niin Office khar a ni.

Aizawl East District hi N.E.India District pakhat ni turin May ni 8, 1994 khan Bethlehem Veng UPC Biak inah Rev. K.Satinvela, khatih laia Gen. Superintendent UPC-NEI chuan ropui takin a hawng a ni. Rev H.Vankunga, General Secretary chuan Executive Board-in District hruaitu atana a ruatte puan chhuahna nei nghal in District hruaitu thar te chu :
District Superintendent :Rev. R.Lalrinsanga
District Secretary : Rev. R.Hrangvunga
District Treasurer : Rev. C.Vala te an ni.
District Conference hmasa ber chu Zemabawk Playground-ah Feb 23-26, 1995 khan neih a ni a, thupuiah ‘Chanchin Tha puan darh’ tih hman a ni.
Tun dinhmuna Aizawl East District hruaitute:
Superintendent: Rev. R. Laltlankima
Secretary: Rev H. Lalropuia
Treasurer: Rev VL. Hnemtluanga
Missions Director: Rev C. Lalmalsawma
Sunday School Director: Rev Rosanga Kawlni
PYD President: Pastor J. Lalhmingsanga
LAD President: Sis R. Lalramsiami B/W te an ni.
Aizawl East District hian a din tirh atangin Pathian hnen ata malsawmna nasa tak a dawng a, tunah hian District chhunga Pastor Bial 32 awm mekin Kum 2026 District Conference report bu atanga a lan danin Kohhran member 29,283 awm mekin Kohhran chhungkua 6413 awmin Kohhran hi khaw 187-ah a ding mek a, tunah hian Preaching Point 13 a awm mek bawk a ni. Aizawl East District hi a dintirh chuan Office mumal pawh nei lovin hmun hrang hrangah mi In luahin an awm kual thin a, tunah chuan Kohhran mipuite leh Pathian malsawmna avangin Ramhlun South, Aizawl-ah Office tha tak neiin tunah hian Building sak hna pawh chak taka thawh mek zel a ni bawk. Kum 2019 khan Aizawl East District hian a kum 25-na, Silver Jubilee chu ropui takin District Building chungah a lo lawm tawh a ni.

Tunah hian District Office-ah hian District hruaitute nen thawktu mi 23 awm mekin Revival Speaker mi 6 an awm mek bawk a ni.


LAD Day:
May 10, Pathianni hi North East India LAD Day a nih angin Aizawl East District chhunga Bial leh Local hrang hrangte pawhin urhsun takin an hmang hlawm dawn a, Bial anga hmang tur an awm laiin Local anga hmang tur an awm bawk a ni. LAD Day hi Pathianni a nih avangin Bial leh Local thenkhat chuan May 11, Thawhtanni-ah awmni khama hmang tur an awm bawk a, hetah hian intihhlimna te, infuihtharna te an nei hlamw dawn a ni. Tun dinhmunah Aizawl East District chhunga Bial 32-ah LAD member 5953 awm mekin LAD hi khaw164-ah a ding mek bawk a ni.


Website tlangzarhna nei:
May 6, Nilaini chawhnu Dar 1 khan District Committee room-ah Aizawl East District website thar upcaed.org chu tlangzarhna neih a ni. He hun hi Rev. VL. Hnemtluanga, District Treasurer, Chairman District Media Committee chuan kaihruaiin Rev. C. Lalmalsawma, Missions Director chuan hunserh a hmang a ni. Rev. R. Laltlankima, District Superintendent chuan tlangzarhna neiin Kohhran ten hmasawnna ropui tak kan nei chu lawmawm a tiin Pathian malsawmna a nih thu a sawi a, tangkai taka hman a nih theihnan tlangzarhna a nei a ni. Evan. Lalhmachhuana Varte chuan report pe in website siam a nih dan te, website chhunga awm tur hrang hrangte leh Kohhran te tana a tangkaina tur hrang hrangte ngaihthlak a ni. Huntawp tawngtaina Rev. H. Lalropuia, District Secretary chuan a nei a ni.

Website tlangzarhnaah hian District Office staff te, District Department OB te, Bialtu Pastor leh Bial hruaitu thenkhat an kal thei a, hlim takin hun hman a ni.

Website-ah hian Aizawl East District chanchin tarlan niin, District Kohhranpui, District Sub- Committee, District Department hrang hrang hrang bakah District chhunga Bial leh Local hruaitute tarlan niin Local leh Bial in a mamawh tur lehkha pawimawh download theih-a dah a ni bawk. Hemi bakah hian Kohhran News tarlan tura ruahman a ni bawk. UPC Aizawl East District website hi browser atangin upcaed.org tih chhut luha luh mai theih a ni.

Biakin sakna tur lungphum phum:
Bawngkawn Bial, Ramhlun Sport Complex Biakin thar sakna tur atan May 6, Nilaini zingkar khan lungphum phumna neih a ni. He hun hian Sport Complex Biakin hmunah neih niin Rev H. Lalropuia, District Secretary chuan lungphum phumna hi a nei a ni. He hunah hian Bialtu Pastor bakah Bial hruaitute leh Ramhlun Sport Complex Kohhran member te an tel thei a ni. Ramhlun Sport Complex Biakin sakna tur atan hian a hmun laizawl tawh a ni.


Mi thar:
May 6, Nilai zan khan Mualpui Kohhranah chhawngkaw khat, member 3 chu sengluh an ni. Bialtu Pastor R. Lalfamkima’n sengluhna hi a nei a ni.

Ngopa Bial chuan Conference Rorel bawhzuiin Church Administration & Financial Campaign chu Mimbung Kohhranah an nei a, Bro TBC Laltlanchhunga chu rawngbawlna nei tur a ruat a ni a, Kohhran ten an hlawkpui hle a ni. Bial Programme hman chhung hian Member thar Mi 4 chu Kohhranah sengluh an ni.

May 3, Pathianni khan Khawzawl Bial, Khawzawl Vengthar Kohhranah Member Pakhat chu Upa Lalmawia (Church Board Chairman) chuan sengluhna a nei.

Sunday School pualin hun hmang:
Thuampui Bial, Zuangtui NPSS te chuan 30 April - 3 May 2026 chhung khan Intermediate chunglam tan Camping an buatsaih. He Camping ah hian Speaker ah Pastor H MS Dawngkima (Rabung Bialtu) chu hman a ni. Camping hlawhtling tak a neih a ni a, Thlarau malsawmna an dawng nasa hle a ni.

Saitual Bial Sunday School Department te chuan May 1 khan Bial huap in Mental health Seminar an buatsaih. Mental health Seminar ah hian Resource Person atan Bro Johny Lalthafamkima hman a ni a, Kohhran ten an hlawkpui hle a ni.

OB Meeting:
May 1, Zirtawpni khan District Office ah, District PYD OB meeting neih a ni a, hetiang hian District PYD OB te Bial chan siam a ni.
1.President :- Zemabawk Bial, Thingsulthliah Bial, Sakawrdai Bial, Champhai Kahrawt Bial, Serchhip Dinthar Bial.

2.Vice President:- Bawngkawn Bial,Keifang Bial, E.Lungdar Bial, Serchhip Bial, Khawbung Bial, Suangpuilawn Bial.

3 Secretary :- Zemabawk North Bial, Kawlkulh Bial,Darlawn Bial, Ngopa Bial, Hnahlan Bial, Sesawng Bial.

4.Asst Secretary :- Upper Republic Bial,N.Vanlalphai Bial,Zohmun Bial,Khawzawl Bial, Rabung Bial.

5.Treasurer :- Bazar Bial,Thuampui Bial,Khawruhlian Bial, Khawlian Bial, Chhingchip Bial.

6.Fin Secretary :- Bethlehem Bial, Mualpui Bial, Khawhai Bial,Saitual Bial, Champhai Bethel Bial.


Hruaitute Programme:
Rev R. Laltlankima, District Superintendent chuan May 10, Pathianni hmang hian Khawbung Bial-ah rawngbawlna neiin hun a hmang anga, May 9, Inrinni-ah Dungtlang Biakin sak thar hawnna a nei ang.

Rev. H. Lalropuia, District Secretary chuan May 10, Pathianni hmang hian Zohmun Bial Mauchar-ah rawngbawlna neiin hun a hmang a, Sailutar Biakin hmun hma enin hun a hmang bawk ang.

Rev. VL. Hnemtluanga, District Treasurer chuan May 10, Pathianni hmang hian Khawbung Bial-ah rawngbawlna neiin hun a hmang anga, Dungtlang Biakin sak thar hawnnaah a tel nghalin thusawi rawngbawlna a nei dawn a ni.

Rev. C. Lalmalsawma, Missions Director chuan May 10, Pathianni hmang hian Lungpho hmunah rawngbawlna neiin hun a hmang ang.